موضوع مهم ركزوا معايا فيه جدا وياريت كلنا نعمله شير للتوعيه
ضروري في الخدمات تعملوا يوم مخصوص تنبهوا فيه علي بناتكم في ابتدائي واعدادي وثانوي اخطار استخدام مواقع التواصل وتعرفوهم حدودهم فين
وكذلك في المدارس ياريت الموضوع يتعمم وتعملوا حصة للتنويه عن مخاطر استخدام السوشيال ميديا ، ضروري جدا ارجوكم
دي استغاثه جاتلي من بنت حبيت انبه عنها علشان الكل ياخد باله
فيه مجموعة منتشره اليومين دول
بتعمل شات جنسي مفبرك بالفوتوشوب بينها وبين شخصية بيختروها عشوائي من الفيس بوك ، ووارد جدا تكوني انتي الضحية الجايه ليهم ..
ويجي واحد منهم يبعت الشات المفبرك ده للشخصية المختاره في رساله
فطبعا البنت تستغرب وتقوله انت مين وايه الكلام القذر ده
فيرد عليها ويقولها ده كلامك اللي هبعته في رساله لكل اصحابك اللي عندك علي الفيس بوك وتبقي فضيحتك بجلاجل
طبعا البنت تنهار وتقوله ليه كده وهتستفاد ايه ؟ وانت مين اصلا انا معرفكمش
فيقولها محدش هيصدقك ، الشات بأسمك وبلينك صفحتك وهيبقي شكلك وحش اوي قدامهم
طبعا البنت تطلب منه يمسح الكلام ده ، فيوعدها يمسحه مقابل انه يدردش معاها في امور جنسيه ،
طبعا البنت ترفض وتقوله هعملك بلوك
فيقولها اوك اعمليه علشان بعدها بثواني سيرتك تبقي علي كل لسان
البنت طبعا تخاف وقلبها يدق جامد وتبدأ تلين معاه وتجاوبه علي كل اللي عايزه مقابل انه يمسح الشات المتفبرك ،، وتنسي تماما انها بكده اديلته شات حقيقي بجانب الشات المنفبرك اللي معاه
لو انتي بنت قوية وفاهمه وناضجه وعارفه ازاي تتصرفي ازاي في المواقف دي ، فيه بنات لا تتعدي العشر سنوات عاملين حساب علي الفيس بوك ، وغيرهم كتير
انا نقيت شوية صور محترمه نوعا ما من اللي اتبعتتلي من بنت بتستغيث من الموضوع ده
لأن باقي الصور فيها كلام مش لطيف للنشر
مش بخوفكم ، هدف البوست اننا نخلي بالنا ونركز كويس في كل حاجه بنعملها
طول مانتي واثقه في نفسك تأكدي ان مفيش مخلوق هيصدق عليكي اي كلمة
لو جاتلك رساله من النوعية دي متاخديش وتدي معاه في الكلام .. اعمليله بلوك علي طول
ولو فعلا نفذ تهديده وبعد لحد من صاحباتك ، أكيد هيقلولك وساعتها ابعتيلهم اسكرين لكلامه معاكي اللي فيه التهديد بحاجه انتي معملتهاش
خلوا بالكم ، واقفلوا الفريندز اللي عندكم ، بحيث مش اي حد يعرف يوصلهم
اقفلوا خاصية الرسايل من اي حد غريب
خلوا بوستاتكم قاصرة علي اصحابكم بس ومش اي حد غريب يشوفها
حتي صوركم الشخصية مش اي حد يشوفها وبلاش صور الكافر تكون صورة شخصية لأنها مفهاش خصوصية وبتكون للعامه كلهم
بلاش تقبلي تاج لنفسك لأن التاج بيتشاف بسهوله
احنا في زمن " وسخ " وللأسف حرب النت حرب قذره بتعتمد علي التشهير والفضايح وسوء السمعه وخلافه ..
لازم تخلوا بالكم لأن اللي عايز يعمل شر مابيغلبش
وعوا بناتكم ، اخواتكم ، زملائكم ، اولادكم في الخدمات ، وبناتكم في المدارس
انشروا الموضوع ده لأنه اتكرر كتير جدا ومع كذا حد
لو جالك شات من حد بالطريقه دي متاخديش وتدي معاه في الكلام ، بلوك علي طول
واعلى ما في خيله يركبه ...
ولو جاتلي شكاوي في الرسايل فيها ابتكار لطرق شر جديده هوعيكم بيها في بوست جديد
ارجوكم اعملوا شير ، جايز حد عندكم محتاج يقراه
وربنا هو الحافظ والساتر ومبدد مشورة الأشرار
